هذي مصري

حسب اللي اعرفه ان كان فيه أهالي مع الشرطة، يعني أهالي وشرطة بيضربوا الاخوان…اللي حصل ده وبيحصل ده مش كويس لانه بيأخر حاجات كتير متأجلة

فكرك انك لو جيبت قلت للناس يلا نحاسب الشركة وقيادات الجيش على اللي اتقتلوا من ٢٥يناير الناس هتهلل وتقول يلا بينا؟

الشرطة كلت عيش بالهبل على قفا اللي الاخوان بيعملوه، غير انك اصلا مش عارف تتكلم لا في دستور ولا عدالة اجتماعية وعيشة إنسانية والناس بتقتل بعض

اللي انا بجد نفسي افهمه هو ايه اللي مطلوب؟ ايه الهدف والغاية؟ يعني كلا الطرفين دلوقتي شايف أيه في نهاية الطريق والمحصلة النهائية للي بيعمله؟ بالذات الاخوان لان هم دلوقتي الطرف اللي معتصم بشكل دائم تقريبا  وبيتظاهر ...يعني الهدف مرسي يرجع؟ ان الجيش نفسه وافق (ودي شبه مستحيلة) فالشعب اللي خرج يوم ٣٠/٦ مش هيرضى ويبقى انت كده بتكب إرادة الناس وهتافهم على الأرض ...

ماعدش فيه رجوع لورا، مش بس عشان ماينفعش، عشان ناس كتير مش هتسمح بكده ولاهترضى باي خطوة لورا. ماعدش فيه اي طريق غير لقدام، للأمام وبس ، وللأسف حتى الأمام ده الإخوان بيبوظوه. تعالى للناس اللي كانت مع الشرطة انبارح، او أهالي اللي ماتوا في المنيل او بين السرايات، او اسر المجندين اللي ماتوا في سينا وغيرها على مستوى الجمهورية، مش هقولك قولهم نفتح تحقيق في اللي حصل واللي له حق ياخده، هقولك قولهم بس:"عيب الاستخدام المفرط في القوة ضد اي حد مسلح، لو تقدر تسيطر عليه بقوة اقل يبقى واجبك تستعمل القوة دي وماتزيدش عنها" وخد ديلك في سنانك وأجري لان رد الفعل ممكن مايكنش مستساغ ليك.

انا مش بتكلم على أحداث قديمة، مش بقول الاتحادية ولا بقول ايام محمد محمود، دول دمهم عند الشعب برد واتجلط وعمل (fibrosis) خلاص، ماهو لو دمهم ماكنش برد ماكنش الناس مستعدة تهتف للداخلية اللي قتلت جيكا والجندي وغيرهم، انا بتكلم على حاجات لسه (fresh)...ده بس عشان اللي بيقولك هو انتوا هتبرروا/هتتحججوا/هتصلحوا الغلط بغلط اكبر. بتكلم على خيام تعذيب لسه بيلاقوا جثث جنبها لدرجة شككت الناس انهم ممكن يسربوا جثث لناس ماتت من التعذيب ويقولك دول من معركة النصر (انا مذهول من الكلام ده الصراحة ومش عايز أعلق عليه).

بجد، حقيقي، تاني، ايه الهدف في الآخر؟