السيسي:"شاور لي أشعب على اللي مزعلك"

حاجة انا لاحظتها في بعض سكان الدول اللي برة ومصر، برة بيحبوا جيوشهم قوي وبيحترموهم، بص كده على صفحات القوات المسلحة او اللي بتساندها على الفيس بوك سواء كانت في بريطانيا او أمريكا هتلاقي مدى احترام الناس دي لأفراد جيوشها رجالة وستات.

رغم ان الجيوش دي ماحربوش على مدار تاريخها قوي زي الجيش المصري، مش استهزاء بيهم، انما البلاد دي ماعداش عليها استعمار واحتلال ومحاولات احتلال زي مصر.

نيجي كمان لحاجة تانية، ايام المجلس العسكري وفي عز ماكان الخلاف مع المجلس العسكري والثوار والفيديوهات اللي مصورة جنود بيتبولوا على المتظاهرين واللي بيحدف طوب وحجارة، كان هم الثوار حاجة واحدة: التأكيد على ان الخلاف مع المجلس العسكري وقادة الجيش، جيشنا ده بتاعنا واحنا اللي عاملينه وجنوده مننا، حتى اللي بيعملوا حاجات غلط واشتركوا في جرائم فدول مش كل الجيش. وكانت المعركة بين الثوار والاسلاميين على ان الخلاف بين الجيش والثوار، وهو الجيش ايه غير مجلس عسكري وقادة وشوية جنود فوق بعض؟ وان قطعت راس الجيش (المجلس العسكري والقادة) الجيش يعيش ازاي؟ يا عم مش قصدنا الجيش، قصدنا القادة، لا يا عم ماهم واحد. طب يمين بعظيم انا قصدي القادة، لا يا عم انت زنديق كافر، وإسلامية إسلامية العسكري مية مية، و المشير هو الأمير وخلافه من هتافات طلعت عشان الجيش. الفكرة مش موقف الإسلاميين، الفكرة موقف الثوار انه يفرق بين خلاف مع القادة وخلاف مع الجيش كمؤسسة كاملة بأفرادها وقيادتها وسلطانها وباباغنوجها.

دلوقتي بقى، مفيش أدنى اهتمام بإظهار الفرق ده في بعض الثوار والنشطاء دلوقتي، انا بفترض حسن النية في معظمهم لأنهم عملوا كتير وشالوا وشافوا كتير في المظاهرات وغيرها، بس برضه من وجهة نظري ان الجيش، كمؤسسة معمولة ومبنية على نظام التجنيد الإجباري وده مش موجود في جيوش دول تانية شايلة جيوشها فوق رأسها، يستأهل مننا احترام زيادة شوية عن كده، طظ يا سيدي في اي قادة مش عاجباك، طظ في السيسي لو معترض عليه، انما الجيش اللي انت خدمت او هتخدم فيه، سواء انت او حد من قرايبك او أصحابك او معارفك، الجيش اللي أفراده مننا، يستأهل احترام مننا.

نيجي بقى بالنسبة للجزء اللي انا عايزه وكاتب الكلام ده كله عشانه، خطاب السيسي.

فيه اعتراضات ولغط وهري وحرت وجرد على كلام الراجل.

اول الكلام ده ان السيسي بيطلب تفويض يفتك بمعارضة، سواء دلوقتي او بعد كده، ولو سيبناه المرة دي، هيفتك بينا كلنا، كلناااااااا.

باشا، هو ايه تعريف المعارضة في وجهة نظرك؟ اصلها على حسب مافهمت ومن قراءتي المحدودة اوي يعني، انها الناس اللي مش في الحكم وبتحاول توصل للحكم وبتحاول تخلي الأمور في الدولة تمشي باللي هي شايفاه صح بكل الطرق مشروعة، انتخاباتك بقى وتحركاتك السياسية وشغل الأحزاب والكلام الرغي ده.

بس خدت بالك من كلمة مشروعة؟ يعني ماقتلش حد، ولا أقول اللي هيرشني بالمية هرشه بالدم ولا خيم تعذيب في مقر اعتصامي ولا الكام الف فيديو اللي بيبدأ عنوانهم ب “اعتداء أنصار مرسي على”

وانت لو شايف ان دي معارضة، يبقى اه يا سيدي الفاضل، انا مع فشخ اي معارضة تمسك سلاح وتهدد بقتل ودم، وقبل اما تقول عليا دموي والخ احب اعرف سيادتك اني طالب في كلية الطب ولسه مساهم في تجميع معدات طبية للقصر العيني ومستشفيات تانية عالجت الناس اللي في رابعة وأحداث الحرس الجمهوري (ملحوظتين هنا: اولها، ان الناس ما اقبلتش على التبرع باي حاجة، قليل اوي، ورغم اني شايف ان ده غلط فادح بس بيبين قد ايه الناس مش طايقة. ثانيها، ان أحداث الحرس الجمهوري دي لحد دلوقتي لغز، كل طرف بيقولك التاني هو اللي ضرب وكل طرف مقدم فيديوهات، بس الاتنين مش مقدمين أدلة كافية وفيه طرف جاب صور من سوريا وفيديوهات من العباسية)

حاجة تانية مهمة برضه، ان السيسي ماجبش سيرة اي طرف، هو قال الإرهاب، كونك خدت الكلام على الاخوان فده معناه انك مقتنع ان هم دول الفصيل المسلح في الشارع دلوقتي حتى لو انت قلت عكس كده ومقتنع انهم ورا كل حاجة حصلت في البلد من تفجير وغيره حتى لو انت بتقول عكس كده.

الاعتراض الثاني بقى، يقولك ايه، يعني هو محتاج تفويض عشان يقوم بشغله؟ الله؟ يا راجل انت مش لسه من كام سطر بتقول انه ماينفعش يعمل كده ويسوي كده عشان ده كده بيحط على معارضة “سلمية”؟ يعني شغله يضرب المسلحين ولا يسيبهم ولا انت شايف ايه يعني؟ اشرحلي الله يكرمك...

بس دي مظاهرات تأييد، ومفيش حاجة في الدنيا اسمها مظاهرات تأييد، هو عايز بيبين انه كويس عشان يترشح للرئاسة...وهو حضرتك فاكر ان شعبيته دلوقتي مش في السما؟ ده الناس بتبيع صوره في الشارع يا بيه (مع اعتراضي على الموضوع) ده لو اترشح رئاسة هياخدها تزكية!!

ولا تكونش فاكر انه عايز يقعد في البيت بيتفرج على التليفزيون ويقول لامرأته:"بس الناس بيحبوني اوي يا جيهان، شايفه ماليين الميادين عشاني ازاي؟" (انا ابتكرت اسم جيهان ده، ماعرفش اسم مراته ايه)

طب مش كده السيسي يبقى زي مرسي؟

مبدئياً، انت كده شتمت السيسي، بس انت شايفه زيه في ايه؟

الله؟ مش كل واحد بيقول لأنصاره ينزل يأييد والكلام ده، زي ما مرسي عمل بعد الاتحادية.

طيب، نشوف مرسي عمل ايه اياميها: البيه طلع كلم الناس (اللي في الوقت ده بيمثلوا فصيل واحد بس من المجتمع هو واقف قدامهم وبيكلمهم) وقالهم "أهلي وعشيرتي" (خص جماعة او فصيل واحد من الشعب بصفة غير الباقي، ان دول اهله وعشيرته وبقيت الشعب أهل مراته وحماته مثلا) وخاطبهم قدام القصر (مش مؤتمر صحفي موجه للناس كله ولا حتى حدث بيذاع على التليفزيون، وعلى حسب ما أتذكر اتذاع بالصدفة نتيجة تغطية الأحداث).

نشوف السيسي عمل ايه: طلع يكلم الناس في حدث عمومي، بيتذاع على التليفزيون (يعني كل الناس سامعاه) وخاطبهم قائلاً "أيها المصريين" (مش أهلي وعشيرتي وخاصتي وقبيلتي) بيطلب ان الناس تبين للعالم كله ان الشعب بيؤيد الجيش وان الجيش مش ناطط على السلطة مستغلاً كره الناس لمحمد مرسي، مش بيطلب ان الناس تهتف باسمه وانت سو كيوت أسيسي مثلاً.

يعني عندك فرق في التوقيت، المكان، المضمون...بس احنا كده يا مصريين، مابناخدش بالنا من الحاجات دي...انما ممكن ناخد بالنا من الدبلة في أيده الشمال او اليمين او القميص متكرمش عند الرقبة، ياي، مش نضيف.

قالك بيتجاوز الرئيس ورئيس الوزراء والناس اللي المفروض في الدولة المدنية أعلى منه منصباً، اه يا بيه، الكلام ده لو عمل مؤتمر صحفي وقالك الكلام ده، لكن ده استغل حدث عمومي جي يتكلم فيه ويدعو الناس لحاجة، زي مثلا سيادتك لما تدعو الناس للفضيلة في حفل تخرجك في الكلية وانت طالع الاول كده يا رب، مش معناها انك تخطيت سلطة عميد الكلية مثلا!!

انا عن نفسي شايف انه طالب ان الناس تنزل تبين فعلا قدام العالم ان الجيش يحظى بتأييد الشعب خصوصا بعد قيام دول كبيرة زي بريطانيا بإيقاف توريد طيارات وأسلحة لمصر، وده نتيجة استقراء الاخوان بالخارج اللي ناس كتيرة تغاضت عنه زي مايكون عادي اني اهتف “يا أمريكا حررينا” وأفرح ان فيه سفن أمريكية جت عند قناة السويس وأفرح بكل ضغط يتعمل على البلاد من الخارج، والله حاسس انهم لو فرضوا عقوبات مالية على مصر هيفرحوا.

الراجل فيه شبهة نضافة، بس الظاهر ان من كتر ما اتنقعنا مع حكام وسخين، ان كان مبارك ولا مرسي، بقينا مش بس مابنصدقش شبهة النضافة دي، يمكن التهمة تطلع ثابتة فعلا ويبقى نضيف بجد، لا، بنحاربها كمان...