مرسي رئيساً

قعدت اكتب كتير و امسح لأني بكل بساطة مش عارف اكتب ايه كمقدمة للموضوع،فهدخل في الموضوع وخلاص.
الموضوع هو أداء مرسي في الرئاسة من ساعة ما مسكها،ناس تشتم وناس تدافع وناس تنقد وناس تشتم اللي بينقد وتباين كتير في آراء الناس حوالين اداؤه.
فقررت ادلدل دلوي أنا كمان كمواطن مصري عندي ٢١ سنة ولو كنت أصغر أو أكبر مش هتفرق كتير لأني حقي كمواطن أقول رأيي أياً كان.
اولاً، انا مبهور بحركة فتح القميص اللي عملها وشايف انها مالهاش اي لازمة من اي ناحية سياسية غير انه حاول يستميل الشعب ناحيته والحركة نجحت واستمالت كتير من الشعب وحسوا ان رئيسهم معاهم...أنا مع الشعب!
ثانياً،سفره للسعودية عشان خاطر مصلحة البلدين ده شيئ كويس ومصر لا يمكن تنهض إلا يعلاقات قوية مع الدول العربية..على الأقل النهضة هتبقى اسهل بدعم من الدول المحيطة،و كمان اهي فرصة يكلم عاهر السعودية على الجيزاوي وإن كانت المحادثات فشلت،اهوه..حاول
العمرة..العمرة دي حاجة شخصية،مش شغل للبلد،مش حاجة تفيدني أو تهمني كمواطن...دي حاجة سخصية خاصة بيك وتفيدك انت..تتعمل في أجازتك،أنت موظف في الدولة،حاجاتك الشخصية تتعمل في أجازتك كش في وقت عملك.إزاي أنت عايز موظفين الدولة يلتزموا إزاي وأنت كموظف في الدولة مش ملتزم بشغلك ومش حريص عليه..جايز أكون أنا غلطان بس ده رأيي.
النقطة الكبيرة بقى...حركة إلغاء حكم المحكمة الدستورية بإحلال مجلس السعب واللغط والهرج ومالمرج اللي حصل بعدها بسبب الموضوع ده..
بقى يا راجل الناس بتوصيك على المعتقلين في سجون العسكر والمحاكمين عسكرياً من قبل اما نتيجتك تطلع وتحلف اليمين تقوم بدل اما تحارب عشان الناس اللي محبوسة وده اللي الناس طالباه اصلاً وتكسب الشعب في صفك وتثبت ان الشعب هو اللي بيحركك،تقوم تعمل حركة زي بتاعة مجلس الشعب دي؟!
طب اهي كانت النتيجة انك عملت انقسام بين الناس بين اللي بيحاول يحافظ على بواقي لاستقلال واحترام القضاء،اللي انت بعد كده احترمته لما حكم ببطلان قرارك، وبين مؤيد ومعارض لقرارك،و انا عن نفسي بقيت بئك ان قراراتك من دماغك لأن اي حد عنده اي قدر من ذكاء او دهاء سياسي كان هيعمل حاجة الشعب طالبها حتى لو كانت ستؤدي لصدام بينك وبين المجلس العسكري كنت ساعتها استملت الشعب ليك وكان الشعب ساندك بضغط شعبي عملك وزن قدام المجلس اللي واكل عليك نص صلاحياتك...
ارجع للشعب يا مرسي، مشي كلام الشعب فوقيك لو حكمت،ده اللي هينجدك ويقف جنبك مهما حصل،لا جماعة ولا حزب ولا مجلس هيقف جنبك لو الشعب قلب عليك وليك في مبارك عبرة،و ليك في القذافي ،وان شاء الله قريب بشار كمان، عبرة.
الشعب يا مرسي،ده السند وده السلاح وده الوزن اللي بجد..

ملحوظة: المقالة دي اتكتبت قبل اما مرسي يصدر عفو عن ٥٠٠ شخص من سجون العسكر...بس فضلت انشرها..اهو يبقى رأيي طلع