تجميعات تويتات "منال احمد" عن ازمة القائد ابراهيم

منال احمد (متابعة للموقف هناك): التويتات متاخدة على مدار اكتر من ٧ ساعات اول تويتة من ٨ ساعات:
إختصارا: المحلاوي دعى للتصويت بنعم، احتج عليه شباب خرجوا بره وهاجموا المسجد بالطوب وحرقوا سيارات خرج شباب إلإخوان ومسكوا 3 منهم عذبوهم جوه
الشباب إللي خرجوا متبهدلين فعلا، قطع بسكين حاد، وصعق كهربي وضرب......جوه المسجد!
مافيش اشتباكات، كل إللي حوالين المسجد ضد الإخوان اللي اعتدوا على الشباب! هتافات ضد مرسي والإخوان وبيقسموا إن اللي اعتدوا مش حيتسابوا
المسجد لسه متحاصر، أمن مركزي ومحتجين! الشرطة خايفة تخرج الإخوان اللي جوه! وقبل ما حضرتك تسأل، الضباط أكدوا أنهم إخوان!
الغضب بيزيد بين الموجودين حوالين المسجد، حتى أهالي المنطقة، من فكرة إن الشرطة "بتتفاوض" مع المعتدي! شباب بيهددوا باقتحام المسجد
هام: السيارات إللي اتحرقت في أول الاشتباكات حسب روايات المتظاهرين وعميد بالأمن المركزي كان فيها سلاح "سيوف وسلاح آلي".
إلسيارات كان بيسوقها "شيوخ ملتحين" حسب رواياتهم جميعا!
إلشيخ المحلاوي يخاطب المتجمهرين في الميكروفون ويؤكد إن مافيش أي حد موجود جوه المسجد، لا محتجزين ولا معتدين. محدش مصدقه وبيهتفوا ضده!
أللواء ناصر العبد: اتحدث إلي أهالي الإسكندرية، وعلى مسؤليتي الشخصية لا يوجد أي متظاهر محتجز داخل المسجد. رجاء إنهاء هذا الموقف. الناس رإفضة
يبدو إن رجال الأمن مش واخدين بالهم أو بيتجاهلوا إن اللي بره منتظرين خروج المعتدين. خايفين كمان الشرطة تفرج عنهم وتسيبهم يروحوا!
تاني: شفت بعيني الشباب اللي خرجوا من جوه المسجد مضروبين ومصابين ونقلتهم سيارات الإسعاف!
مافيش أي اشتباكات من أي نوع حاليا! لا عند المسجد ولا في أي مكان قريب منه، كان فيه كر وفر في بداية المشكلة بس! كلها شائعات
أصلا مافيش أي ضرب نار ولا خرطوش! مافيش إصابات، غير الشباب اللي اتضرب جوه المسجد و2 من الإسلاميين كان معاهم سلاح والشباب مسكوهم وسلموهم
العربيات اللي اتحرقت كان نازل منها سلفيين "لوجو حزب النور على العربية" ومعاهم سيوف وسلاح آلي
مقدم في الامن المركزي بيقول لي "متخيلة بكرة حيحصل 'فينا' إيه"؟ طب بالذمة لما الشرطة تقول كده، احنا نقول إيه؟ :( :(
كلمة أخيرة حمووت وأقولها: ضابط أمن مركزي إنهاردة، بأقوله ينفع التهريج اللي بيحصل ده، ما تنهوا الموقف، رده كان: ربنا بيخلص منكم ذنب...مبارك!
قلت لناصر العبد مدير المباحث، يحاول يخرج الناس إللي جوه في يونيفورم أمن مركزي،ويأخذهم المديرية، قال لي طيب وحخبي ذقنهم إزاي :(
توضيح معلش: الشيخ المحلاوي مش محاصر، هو جوده المسجد آه، لكن الشباب بره بيطالبوا بتسليم الشباب إللي عذبوا أصحابهم جوة المسجد، مش عايزين الشيخ
إلشيخ حسب كلام ضابط مباحث رافض يسيب الشباب اللي متحاصرين جوه ويمشي هو حاسس بمسؤولية ناحيتهم! الشباب إللي بره بيطالبوا بالقصاص من المعتدين بس
تاني: الشباب خارج المسجد أكدوا للضباط إنهم مش بيستهدفوا الشيخ المحلاوي، هما عايزين الشباب إللي جوه. والله الكلام ده اتقال أمامي أكتر من مرة
تإنني، لأ ثالث: السيارات اللي تم إحراقها وُجد بها اسلحة "سلاح آلي و2 خزينة سلاح" والأشخاص اللي نزلوا منها "ملتحين" كانوا بيحملوا سيوف!
إشتباكات بين الأمن المركزي وإسلاميين وضرب قنابل غاز، الأمن بيحجز بين الطرفين :(
الاشتباكات زادت وكر وفر بين المتظاهرين والإسلاميين والشرطة. والله والله الشرطة لو عايزة تنهي الموقف حتنهيه، دي قلة أدب وتعمد واضح للفوضى
ضباط الأمن المركزي من إلبداية واقفين يهزروا ويضحكوا حواليّا ولا كأننا في مصيبة ومشهد صغير من حرب أهلية. الناس دي بتلعب لعبة قذرة
لمتظاهرين بييجي لهم تليفونات إن مجموعات سلفية وإخوان تانية في طريقهم لفض الاعتصام إن لم تفضه الشرطة بأقول للضابط إنهي الموقف بيقول لي إزاي
وده لينك لاخر تويتة: https://twitter.com/Manalahmed137/status/279706438232850432
حطيته عشان اللي يحب يشوف اكاونتها
انا كاتب كل البوست ده بسرعة كطه بس عشان الانجاز عشان الناس اللي بتطلع اشاعات وتهاجم الناس اللي طلعت اللي اتعذبوا جوا وعايزين المعتدين يتحاسبوا
حرمة المسجد تمنعني اني اهاجموا عشان اطلع ناس مخطوفين جوا وبيتعذبوا انما ماتمنعنيش اني اخطف ناس واعذبهم جوا واحولوا لمنبر سياسي القي عليه خطبة سياسية تنصر فريق على فريق ومصر في عز حالة استقطاب؟

العبثية مالية الدنيا يا فوزية

خرج علينا الدكتور محمد مرسي مبارك بالاعلان الدستوري الخارق الذي لا يمكنني ان اشك "قيد انملة" في نوايا سيادة الرئيس من اصداره، والا تلقيت لكمة عن يميني او خرطوش عن شمالي.
انقسم الشارع المصري بين مؤيد للقرارات "الثورية" وماعرض يرى في هذه القرارات وأد لكل ما مثلته الثورة واحياء لكل ما قامت ضده ولكن بشكل ابشع. فكأن مبارك خرج من طرة اكثر شباباً وبذقن وبكاريزما أقل وبجماعة اسلامية.
انا الصراحة من الفريق الاول...لاني مقتنع ان فيه واحد بعد اما هيبقى الكل في الكل هيتنازل كده...الخوف بس انه مش هيلتزم بمعاده...مش شكاً فيه لا سمح الله..لا وابداً ولع وتؤ ولجلج..انما المصريين فيهم جين عدم الالتزام بالمواعيد وده واضح في ميعاد الرئيس مع المعارضة...تعالولي الساعة ١٢ او ١٢ ونص كده..على الضهر كده...
اصلا مش مرسي بس اللي عنده مشكلة في المواعيد..ده مصر كلها عندها مشكلة في المواعيد..المجلس العسكري يا مؤمن مش قالك هنقعد ٦ شهور بس؟ ويادوب غير هدومه ولبس الجزمة واتشيك وجه ينزل حسب معاده كان واخد سنتين بالتمام والكمال.
بلاش يا سيدي، مجلس قيادة الثورة مش قالك في ١٩٥١ انه هيدي السلطة للمدنيين؟و اهه في المواصلات وكده قعد ٦٠ سنة حكم عسكري.
وانا طبعاً لا اشك ان مرسي هيستخدم سلطته الجبارة دي استخدام سيئ لا سمح الله...لجلج ايضاً.
الراجل سايب المحلة مستقلة...المحلة اللي جنبنا في طنطا دي..آه..استقلت وبقيت عشان اروح لازم آخد تأشيرة من السفارة في طنطا الاول بس الحمد لله الموضوع مش ازمة لان وزير الصحة هناك دفعتي في طب الحمد لله يا رب.
واهه،الراجل سايب المحلاوية يعملوا اللي هم عازينه، بذمتك يا راجل يا مؤمن ، مش قصدي ابداً تريقة زي خالد عبد الله، شفت ديموقراطية اكتر من كده؟عمرك في حياتك شفت رئيس دولة ديموقراطي اكتر من كده؟سايب مدن في بلده تستقل من كتر اما اتخنقت منه؟
وسيبك من حكاية ان محمود سعد اتشد على النيابة عشان انتقد مرسي والقانون المستخدم ضده من ايام الملك فؤاد وعقوبته من سنة ل٣سنين سجن وان القانون حاجة عاملة زي اهانة الذات الملكية او الرئاسية كده.
الراجل ديموقراطي ولا شك...مش مصدق؟ اجيبلك دليل يخرم عينك يا علماني يا كافر يا زنديق يا آكل الجبنة النستو وسافف الفول الامريكانا يا وغد...
سيادة الرئيس لما كان قاعد مع القضاة من المحكمة الدستورية مش سابهم نص ساعة ورجعلهم بقرارات وآراء مختلفة عما كان قبل اما يسيبهم النصاية دي؟ تفتكر عمل ايه؟ استشار المرشد واهل بيته...ديموقراطية دي ولا مش ديموقراطية يا متعلمين يا بتوع المدارس؟ استشار حد ولا لأ؟ مبارك كان بيعمل كده؟ ابداً...لا ولع ولجلج، كان بيخلي رأيه من دماغه هو و بس وكان عنيد كمان...انما مرسي...الرئيس اللي زي البلسم تحطه على الجرح يطيب...كان متفق مع القضاة على حاجة وخد رأي المرشد...الراجل اقنعه بوجهة نظر تانية قام مغير رأيه مفيش كلام.
وكمان الراجل بيؤمن بتداول السلطات..اقولك ازاي...مش ساب رئيس الوزراء يكمل الحوار مع القوى السياسية المعارضة اللي كانت مكونة من حزب الحرية والعدالة وكام حزب تاني؟ساب حد ينوب عنه يا جماعة بعد نص ساعة من الاجتماع...مبارك عملها؟ لا يا بابا، مبارك كان بيسيب ابنه ده ساب رئيس الوزراء يدير “القاعدة” في عز أزمة زي دي، ده واثق في قوة رئيس الوزراء انه هيخلص الازمة من غير تدخل منه.
هتقوللي طيب هو مش بيرجع في كلامه ليه رغم المعارضة اللي في الشارع...هقولك الناس دي كلها غلط انما الرئيس اللي معاه شرعية قرآنية ونبوية ده رأيه صح...ده وحي يا جماعة...
كفاية اوي انه قال لو ان الشعب المصري خرج ينادي برحيلي سارحل وقال قوموني ما اطعت الله فيكم...هتقولي ده عصى الله فينا لما عمل اعلان دستوري ديكتاتوري كده هقولك لا، طاعة الله من طاعة المرشد ومادام المرشد راضي يبقى هو كده ماشي صح...انت اللي عميل ومش عاجبك القرارات الثورية دي...
واحب اختم كلامي بعد اما اثبت ان الاعلان الدستوري ده كان لازم عشان المسار الثوري القويم وان مرسي ماكدبش في ولا حاجة قالها وانه كويس قوي وفي الديموقراطية قوي اوي اوي احب اسيبك تتفرج على الخطاب المؤثر الحقيقي للرئيس