الانفلات الامني

طبعا كله عارف مشكلة الانفلات الامني اللي مصر فيها..اللي فاضله شوية و يبقى الامن ماشي على حل شعره و مش بعيد يجيلنا ممسوك في قضية اداب بعد كده...انفلات بقى..!!

طب يا ترى ايه سبب الانفلات ده اللي يعزى اليه وقوف عجلة الانتاج اللي المجلس العسكري و مجلس الوزراء و مصر كلها بتفخ و تزق فيها عشان تدور و في الاخر مدارتش..و حتى المظاهرات و الاعتصامات ,اللي هي حق مشروع و منعها و التصدي اللي كان بيحصل ليها من امن الدولة و الامن المركزي هي سبب من اسباب قيام الثورة,منعوها عشان عجلة الانتاج دي..

هل ياترى الشرطة واخدة في نفسها و زعلانه من نظرة الشعب ليها؟طب مش هم اللي عملوا في نفسهم كده من الاول لما انسحبوا من كل المواقع حتى معبر صلاح الدين اللي مع اسرائيل..و هل حل النظرة دي انني اقعد في بيتي؟اخد مرتبي من ضرايب الناس اللي مفروض بحميهم..باخد مرتبي من مرتبهم عشان اقعد في البيت؟طب ما ده ههيخلي النظرة اسوأ..

ولا هل يا ترى هيبة البدلة راحت يا باشا؟انا اللي اعرفه ان في حاجة اسمها قانون و قوة بيتطبق بيها القانون...مسمعتش قبل كده عن تاجر مخدرات مثلا شاف ظابط ماشي في الشارع فقام سلم نفسه عشان خاف من هيبة البدلة..اما بالنسبة للشعب..فالشعب بيساند الظباط لما بيقوموا بواجبهم...و الدليل على كده..مأمور الموسكي لما جاب الالي بتاعه و داغع عن الحي ضد البلطجية..الناس وقفت وراه و ساعدته..ماوقفتش ورا البلطجية..

ولا البلطجية دلوقتي كتير و زي الرز؟طب ماهم لما بيحبوا يمسكوا حد فعلا بيمسكوه...و حصلت اكتر من مرة...حتى لو وصلت انهم يحددوا موقعه باستخدام موبايل المطلوب القبض عليه عن طريق القرية الذكية...و عندهم معظم,ان لم يكن كل,المعلومات المطلوبة للقبض على معظم المسجلين خطر...امال لما حد بيبلغ عن جريمة...بيعملوا عرض للمتهمين ازاي؟

يا اما حاجة تانية خالص غير الكلام ده...ان المجلس العسكري انشغل بحماية الثورة عن حماية الشعب..يعني الصراحة المجلس معذور برضه..مابين اعلان دستوري لم يلتزم فيه بالاستفتاء اللي حصل على الدستور..و لم يستشر فيه احد..و تحويل صحفيين و نشطاء للنيابة العسكرية..و تحويل مدنيين للمحاكمات العسكرية..اكيد هيتبقى شوية وقت و مجهود..عشان ينام قبل الخطوة اللي جاية..

المشكلة ان يكون المجلس العسكري يهدف لان يجعل الناس تشعر ان الثورة سلبياتها اكثر من ايجابياتها..خصوصا ان مفيش حاجة اتغيرت من قبل الثورة عن بعد الثورة غير ان مثلا..بدل ماكنت بتروح امن الدولة عشان رأي سياسي..بقيت بتروح النيابة العسكرية..و مصر نقصت 800 نسمة..و طبعا..الاحساس الزائف بالامن..راح.

طب و ليه يهدف المجلس العسكري لكده؟طبعا رغبة منه في الدفع بمرشح عسكري للرئاسة..و بالتالي الناس تتجه اليه بوصفه المخلص..عسكري و هيشكم البلد و حسب معظم الكلام اللي بسمعه من الناس..ده المطلوب..رئيس عسكري يرجع الامن..و لحظتها..هيبقى كأنك يا ابو زيد ماغزيت..ولا اتظاهرت لمدة 18 يوم..و عملت ثورة و مات منك 800 او اكتر كمان...