الافكار المقولبة هي شيئ بسيط جدا في تعريفه...هي ان سعادتك تحكم على واحد في حاجة من خلال صفة لا تمت الى الصفة دي في شيئ...لخبطتك؟
نجرب المثل ده...سعادتك ماشي في الشارع...بتتفرج على تليفزيون...او بتبص على صورة حد في الجورنال...هوب..لقيه لابس حظاظة او سلسلة او ما شابه...هوب..يبقى الواد ده ماسوني(الاتهام المفضل لمعظم الناس في الفترة الاخيرة) او عيل سيس (الاتهام الثاني من حيث التفضيل)...
هتقوللي:” لا و الف لا..انا مش بعمل كده..” هقولك مش شرط عشان مقولتش ماسوني او سيس تبقى افكارك مش مقولبة...انت اول اما بتشوف دكتور داخل عليك مثلا المحل..بتبقى عامل ازاي؟عينيك بيظهر مكانهم $.$ زي عم دهب اما يقع في ايده صفقة العمر...رغم ان في الحقيقة الدكتور ده زيه زيك..بالعافية و بالمجهود مستورة عليه..
طب ليه اتسمت مقولبة يعني؟عشان ساعدتك بتبقى جهاز..اول ما ندوس على زرار(بمعنى انك تشوف حظاظة)..تقوم مطلع قالب (قايل عليه ماسوني او سيس او صايع)..
طب انا ليه ناحر في قلبي و بكتب في الموضوع ده؟عشان حرام نفضل بالصفة دي فينا حتى بعد الثورة..خصوصا ان الافكار المقولبة نشأت نتيجة الرضاعة من الاعلام المصري..و الكسل في انك تقوم بمجهود حقيقي عشان تقيم اللي قدامك...يعني ايه الاسهل؟حظاظة يبقى الواد ده سيس...ولا تقعد تسمعه..و تفكر في كلامه و تقيمه و تاخد قرار في الاخر؟
المطلوب ان كل واحد قبل اما يصدر قرار على حد..قبل اما تحكم على حد انه كويس او وحش..دور وراه..اسعى شوية انك تسمعه و انك تفكر في كلامه...شغل مخك قبل اما يصدي منك...ماتخدش اي كلام يتقالك على انه حقيقة...لأن هو ده اللي حصل ايام الثورة لما قالوا اجندات و كنتاكي..لو كان حد فكر في الكلام قبل اما يصدقه مكنش فيه حد صدق حكاية الكنتاكي دي و بالفعل اللي حاول يعرف الحقيقة و راح شا و سمع بنفسه..انضم للثوار في التحرير..
في نكتة سمعتها من واحد اعرفه...قالك ان انضف مخ في العالم هو مخ المصري...عشان لسه بكرتونته...يا ريت نغير ده...و نسعي لمعرفة الحقيقة قبل اما نقولب..
No comments:
Post a Comment
please don't curse or use profanity. State your opinion without attacking others. If you couldn't comment send me a @ on twitter (but I prefer if you post a comment here). thanks