انهن لا ينظفن البزاز يا اخ هشام

خرج علينا الجهبذ هشام قنديل يخبرنا عن خبراته وشغله اللي خلاه يلف قرى مصر وشرقها وغربها وقعد كما يقعد اي شخص ذو خبرة في القرية يحدثنا بقى عن الهوايل اللي شافها.

فما بين ستات مش بتنضف صدرها وبيجيبوا للولاد اسهال لستات بيشوفها بتغتصب في الحقول لمواطنين مش بيدفعوا مية وكهربا بنسبة ٩٩٪.

انا ذهلت الصراحة...لا يا جماعة كده مصر حصل فيها ثورة...قلنا يا سيادة رئيي الوزاء ايه كمان وحش في مصر؟

قالك المواطنين ولاد التيت مش بيدفعوا مية وكهربا ولاد الذينة...ونساء تغتصب وعاااااا حاجات يشيب لها الرأس

انا هاخدها نقطة نقطة كده افش غلي فيهم...
اولاً: كنت اظن ان بعد الثورة الحكومة هتكلف خاطرها وتعمل بكام الف جنيه شوية ابحاث ومزارع عشان تعرف سبب اسهال الاطفال ان كان فيه انتشار دلوقتي وهو بيتكلم عنه...اما لو بيتكلم عن ايام ماكان بيلف في ٢٠٠٤ فبرضه ماينفعش يفتي من غير تحاليل لان الاسهال ده مش عرض يشخص مرض، اي حاجة تعمل اسهال من ايدز لحد مضاعفات لفشل عضلة القلب (او على الاقل بيدرسولنا كده في كلية طب طنطا العريقة). ويرجوا ملاحظة انه قال المية مش نضيفة في القرى دي...يعني المية الوسخة قشطة انما صدر مش متنضف؟يع،يجيب اسهال

ثانيا: هو حضرتك عملت احصاء للناس اللي بتدفع مية وكهربا؟وبعدين بتقول الناس دي مش بتدفع مجاري فا مش بيجيلها مجاري، هو المفروض انا بدفع الاول وبعدين الخدمة تجي ولا الدفع مقدماً؟

وبعدين انت عمال تقول حسب خبرتي، حسب شغلي...لو حسب خبرتك وشغلك فبرضه دول مايدلوكش حق انك تصرخ بمعلومات زي دي وانت حتى مش طبيب بيطري يا اخي فتقول اه ماهي المواشي فيه بينها وبين البشر تشابه.

وبعدين هو حضرتك بتشتكي؟ ولا بتعرفنا ان فيه مشاكل كتير؟ اومال سيادتك شغال ايه؟ مش شغلتك تحل الحاجات دي؟ وخصوصاً ان لو سيادتك بتعرفنا فوالله متشكرين فشخ على المعلومات اللي عارفينها من دراسات ٢ اعدادي.

والاهم من كل ده، يعني نساء بتغتصب يا مؤمن على بعد ١٥٠ كيلو من القاهرة والداخلية شاغلة نفسها بشوية ناس بيهتفوا حرية في الشارع؟ وحضرتك كنت بتتفرج عادي؟ ولا هم كانوا بيحكولك بحكم انكم ستات زي بعض؟

واموت وافهم، ايه علاقة الهبل ده بكونك من طبقة متوسطة؟

نفس هبل وجهل الحكومات اللي قبل كده،تصريحات وفتي من غير اي دراسة ولا تكلف نفسك تسأل قبل اما تخلي شكلك وحش.

بس على العموم...ماجتش على دي يعني...انت ورئيسك الايام دي مطينين الدنيا اكتر من تصريح بإن الثدي الوسخ يجيب العيا البطال....